मागच्या कर्जमाफीत बँकांचा फायदा झाला; आता गरजू शेतकऱ्यांनाच लाभ देण्यासाठी धोरणाची पुनर्रचना समिती काम करत आहे.
कर्जमाफी निश्चित, पण धोरणात मोठा बदल
राज्याचे उपमुख्यमंत्री देवेंद्र फडणवीस यांनी शेतकरी कर्जमाफीच्या मुद्द्यावर महत्त्वपूर्ण भाष्य केले आहे. आज एका कार्यक्रमात बोलताना त्यांनी शेतकऱ्यांची कर्जमाफी ही निश्चितपणे करणार असल्याचे आश्वासन दिले आहे. मात्र, यापुढे सरकार संपूर्ण कर्जमाफीच्या भूमिकेपासून दूर राहील आणि केवळ ज्या शेतकऱ्यांना खऱ्या अर्थाने आवश्यकता आहे, त्याच शेतकऱ्यांना कर्जमाफी दिली जाईल, असे त्यांनी स्पष्ट केले आहे. यामुळे कर्जमाफीचा लाभ मिळणाऱ्या शेतकऱ्यांची संख्या मर्यादित होण्याची शक्यता वर्तवली जात आहे.
बँकांना नव्हे, शेतकऱ्यांना फायदा देण्यावर सरकारचा भर
पूर्वीच्या कर्जमाफी योजनांवर भाष्य करताना फडणवीस यांनी सांगितले की, २०१७ आणि २०२० मध्ये कर्जमाफी लागू करूनही शेतकऱ्याला नेमका किती फायदा झाला हे स्पष्ट होत नाही, पण यामध्ये बँकांना मात्र मोठा फायदा झाला होता. त्यामुळे, शेतकऱ्याला या कर्जाच्या दुष्टचक्रातून काही काळासाठी तरी बाहेर कसे काढता येईल, यावर विचार करणे आवश्यक आहे. कर्जमाफीचे योग्य स्ट्रक्चरिंग करण्यासाठी सध्या एक समिती काम करत आहे. या समितीच्या माध्यमातून कर्जमाफीचे स्वरूप निश्चित केले जाईल, जेणेकरून त्याचा थेट आणि मोठा फायदा शेतकऱ्याला होईल. याच कारणामुळे, ‘आवश्यक त्याच शेतकऱ्यां’ ना लाभ देण्याचा निर्णय घेण्यात आला आहे.
