राज्य शासनाने एकूण २०३ कोटी रुपये वितरित करण्यास दिली मंजुरी; अमरावतीमधील ३,९१० शेतकऱ्यांचा मार्ग मोकळा.
फळपीक विमा वितरणाला अखेर सुरुवात
आंबिया बहार २०२४ चा जो फळपीक विमा इतके दिवस थकीत होता, त्याच्या वितरणाला अखेर सुरुवात झाली आहे. रत्नागिरी, रायगड, सिंधुदुर्ग, जळगाव आणि धुळे या जिल्ह्यांमध्ये मागील काही दिवसांपासून विमा वितरण सुरू झाले होते. अनेक महसूल मंडळांमध्ये तांत्रिक अडचणी, हवामानाशी संबंधित आक्षेप आणि पडताळणीतील विलंबामुळे हा विमा थांबला होता. आता राज्यशासनाने आंबिया बहार २०२४ साठी एकूण २०३ कोटी रुपये वितरित करण्यास मंजुरी दिली आहे, ज्यामुळे प्रत्यक्ष शेतकऱ्यांना मोठा दिलासा मिळाला आहे.
अमरावती जिल्ह्यासाठी दिलासादायक निर्णय
अमरावती जिल्ह्यासाठी हा निर्णय अत्यंत दिलासादायक ठरला आहे. जिल्हाधिकाऱ्यांनी केलेल्या सातत्यपूर्ण पाठपुराव्यानंतर अमरावती जिल्ह्यातील संत्रा, मोसंबी आणि केळी पिकांचा विमा अखेर मंजूर करण्यात आला असून, वितरणाला देखील परवानगी मिळाली आहे. या रकमेतून अमरावती जिल्ह्याचा हप्ता आता सोडण्यात आला आहे.
